“ସ୍ୱୀକାର” ଓଡ଼ିଶାର ଏକ ଭିନ୍ନ ସ୍ୱାଦର ରଙ୍ଗୀନ ସାପ୍ତାହିକ ପତ୍ରିକା । ଏହାର ପ୍ରତିଷ୍ଠାତା ସୁସାହିତ୍ୟିକ ତଥା ଆକାଶବାଣୀ କେନ୍ଦ୍ରର ଅବସରପ୍ରାପ୍ତ ସହକାରୀ ନିର୍ଦ୍ଦେଶକ ୰ ଶରତ ନାରାୟଣ ବେହେରାଙ୍କ ସମ୍ପାଦନାରେ “ସ୍ୱୀକାର” ସମ୍ବଲପୁରରୁ ଏକ ଦୈିନିକ ସମ୍ବାଦପତ୍ର ରୂପେ ଆତ୍ମପ୍ରକାଶ କରିଥିଲା । କିନ୍ତୁ ଚାରିବର୍ଷ ଏହା ପ୍ରକାଶ ପାଇବା ପରେ ଆର୍ଥିକ କ୍ଷେତ୍ରରେ ସ୍ୱଚ୍ଛଳ ନ ହୋଇ ଏକ ସାପ୍ତାହିକ ସମ୍ବାଦପତ୍ର ରୂପେ କିଛି ଦିନ ଧରି ପ୍ରକାଶ ପାଇଲା । ତେବେ ମୁଦ୍ରଣ ଶିଳ୍ପର ବିକାଶ ଏବଂ ସମ୍ବାଦପତ୍ର ପ୍ରକାଶନ ପାଇଁ ଆନୁଷଙ୍ଗିକ ଖର୍ଚ୍ଚ ବୃଦ୍ଧି ପାଇବାରୁ ତାହା ମଧ୍ୟ ବନ୍ଦ ହୋଇଗଲା । ଏହାର କିଛି ଦିନ ପରେ ୰ ବେହେରା ଦୈନିକ ଇଂରାଜୀ ଓ ଓଡ଼ିଆ ସମ୍ବାଦପତ୍ର ମାନଙ୍କରେ ଦୀର୍ଘଦିନ ଧରି ସାମ୍ବାଦିକତା କରିଥିବା ସାମ୍ବାଦିକ ହେମନ୍ତ କୁମାର ମହାପାତ୍ରଙ୍କୁ ୨୦୦୮ ମସିହାରେ ଏହାର ମାଲିକାନା ହସ୍ତାନ୍ତର କରିଥିଲେ । ୨୦୦୮ ମସିହା ଅକ୍ଟୋବର ୨୬ ତାରିଖରେ ବହୁ ବର୍ଷ ଧରି ବନ୍ଦ ହୋଇ ପଡ଼ିରହିଥିବା “ସ୍ୱୀକାର” ହେମନ୍ତ କୁମାର ମହାପାତ୍ରଙ୍କ ସମ୍ପାଦନାରେ ଏକ ଭିନ୍ନ ସ୍ୱାଦର ରଙ୍ଗୀନ ସାପ୍ତାହିକ ପତ୍ରିକା ରୂପେ ପ୍ରକାଶ ପାଇଲା । ସେହିଦିନଠାରୁ ନିରବଚ୍ଛିନ୍ନ ଓ ନିୟମିତ ଭାବେ ଏହି ବାରପୃଷ୍ଠାର ସମ୍ବାଦପତ୍ର ଶ୍ରୀ ମହାପାତ୍ରଙ୍କ ସମ୍ପାଦନାରେ ପ୍ରକାଶିତ ହୋଇଆସୁଛି । ପାଠକ ମହଲରେ ଦିନକୁ ଦିନ ଏହାର ଆଦୃତି ବୃଦ୍ଧି ପାଇବାରେ ଲାଗିଛି । ଅନେକ ଝଡ଼ଝଞ୍ଜାର ସମ୍ମୁଖୀନ ହୋଇ ମଧ୍ୟ ଏହି ସମ୍ବାଦପତ୍ର ନିଜର ନିରପେକ୍ଷତା ବଜାୟ ରଖିଛି । ସମାଜରେ ହଇଚଇ ସୃଷ୍ଟି କରିବା କିମ୍ବା କୌଣସି ନିର୍ଦ୍ଧିଷ୍ଟ ବ୍ୟକ୍ତିର ଚରିତ୍ର ସଂହାର କଲା ଭଳି କୌଣସି ସମ୍ବାଦ ଏହି ପତ୍ରିକାରେ ପ୍ରକାଶ ପାଇ ନାହିଁ । ସମାଜକୁ ଏକ ସକାରାତ୍ମକ ବାର୍ତ୍ତା ଦେବା ଉଦ୍ଦେଶ୍ୟରେ ପ୍ରକାଶିତ ଏହି ସମ୍ବାଦପତ୍ର ନିଜ ଲକ୍ଷ୍ୟରୁ କେବେ ବିଚ୍ୟୁତ ହୋଇନାହିଁ । ଏପରିକି ସମାଜରେ ଘଟୁଥିବା ବିଭିନ୍ନ ପ୍ରକାର ଅପରାଧ ଜନିତ ସମ୍ବାଦକୁ ଏଥିରେ ସ୍ଥାନ ଦିଆଯାଏ ନାହିଁ । ବିଭିନ୍ନ ଫଳ ଓ ପନିପରିବାର ଉପକାରିତା, ଆଧ୍ୟାତ୍ମିକ ଓ ପ୍ରେରଣାଦାୟୀ ଲେଖାଗୁଡ଼ିକ ଏଥିରେ ନିୟମିତ ଭାବେ ପ୍ରକାଶିତ ହେଉଛି । ଏହା ଛଡ଼ା ପିଲାମାନଙ୍କ ପାଇଁ ଅନେକ ଶିକ୍ଷଣୀୟ ଲେଖା ସାଙ୍ଗକୁ ସାଧାରଣ ଜ୍ଞାନ ପ୍ରଶ୍ନ ଓ ଉତ୍ତର, ବିଭିନ୍ନ କ୍ଷେତ୍ରରେ ଲବ୍ଧପ୍ରତିଷ୍ଠିତ ବ୍ୟକ୍ତିମାନଙ୍କର ଅନେକ ଉପାଦେୟ ଲେଖାମାନ ପ୍ରତ୍ୟେକ ସପ୍ତାହରେ ପ୍ରକାଶ ପାଉଛି । “ସ୍ୱୀକାର” ନିଜକୁ କେବଳ ଏକ ସମ୍ବାଦପତ୍ର ରୂପେ ସୀମିତ ନ ରଖି, ବର୍ଷର ବିଭିନ୍ନ ସମୟରେ ଅନେକ କାର୍ଯ୍ୟକ୍ରମ ଆୟୋଜନ କରିଥାଏ । ପ୍ରତ୍ୟେକ ବର୍ଷ ଅଗଷ୍ଟ-ସେପ୍ଟେମ୍ବର ମାସରେ ‘ବାର୍ଷିକ ସାରସ୍ୱତ ସମାରୋହ’ ଅନୁଷ୍ଠିତ ହୋଇଥାଏ । ଏହାଛଡା ପ୍ରତିଭା ସମ୍ମାନ ସମାରୋହ, ଆଲୋଚନାଚକ୍ର, ପଶ୍ଚିମ ଓଡ଼ିଶାର ଲୁପ୍ତକଳା ଗୁଡ଼ିକର ପୁନରୁଦ୍ଧାର ପାଇଁ କର୍ମଶାଳା ଓ ସମ୍ମିଳନୀ ମଧ୍ୟ ଆୟୋଜନ କରିଆସୁଛି ।